"Shamim", Shamim Jaipuri Sahab Marhoom ki Ghazlon ka pahla majmooa hai.
Shamim Sahab, Hazrat Taskeen* Quraishi aur Jigar* Moradabadi ka zikr karte huey likhte haiN ke " UnhiiN buzurgoN se maiN ne Shaeri hi nahiN balki zindagi ke baare meiN bhi bahot kuch seekha hai, jo aaj tak kaam aa raha hai aur hameisha kaam aata raheiga. Yeh nukta bhi unhiiN hazraat ki khidmat meiN rahkar samjha hooN ke achcha Shaer banNe ke liye achche dil aur aala kirdaar ki zaroorat hai. yaani achcha insaan hi achcha Shaer ban sakta hai."
Yaqeenan Shamim* Sahab eik achche Shaer ke saath saath eik achche insan bhi thEy. Unka yeh Sheir unhiiN per sadiq aata hai:
Kuch is tarah se raho, rooh e gulsitaN bankar
Tumhaare baad, tumhari mahek chaman meiN rahe
Classical Urdu Ghazal ke iss shaer ko uski zindagi mein woh muqam nahiN mila jiske woh haqdar thEy. Kuch filmoN meiN gaane bhi likhe, Begum Akhtar Faizabadi ne unki kai ghazlein gaiiN, Mushaere bhi padhe, magar doosre shoara ke muqable meiN bahot kam. YahaN shoara ke group baney huEy hain, Shamim Bhai kisi bhi group meiN nahiN they. Aksar muscat meiN Mushaere ke baad bhi 2-4 hafte unka wahaN qayam
rahta tha. Nashistein hoti thiiN, jismein ahle Muscat kai kai ghante unko sunte thEy.
Shamim Sahab ka kahna tha ke Ghazal hi asnaf e sukhan mein eik aisi sinf hai jismeiN gham e janaN hi nahiN gham e dauraN ko bhi samoya ja sakta hai, ba-sharte ke Shaer Ghazal ka mizaj shinas ho. Yeh Ghazal ki hi khoobi hai ke woh apne ma'shre ki bhar poor akkasi karti hai. Shamim Sahab sachchi Shaeri ke qaael thEy. Unka kahna tha ke agar maiN sharab ki lazzat se aashna nahiN to mahez iss liye likhooN ke sharab ke mazameen aaj ke Mushaeron mein pasand kiye jaate haiN to yeh Shaeri jhooti hai. Aajkal ki Ghazal ke baare mein unka khayal tha ke aajkal Ghazal ke saaNche ko jis tarah badalne ki koshish ki ja rahi hai aur usey aadmi hi ki tarah hippy banaya ja raha hai, usey mahez farar ka naam diya ja sakta hai, jiddat nahiN kaha ja sakta. Jiddat ko to maiN bhi pasand karta hooN lekin har be-ma'ani aur be-dhangi cheez ko jiddat hargiz tasleem nahiN karta.
Ab unke jaisa Shayer aur neik insan mushkil se hi mileiga.
